Европската унија повторно нема да отвори преговори со Македонија на Самитот на европските лидери кој на крајот на оваа недела се одржува во Брисел, дознава НОВА.
Но, ЕУ ветува дека на ова прашање ќе се наврати во 2015 година, во било кој момент, врз база на идните оценки на Европската комисија (ЕК) за опипливите реформски чекори во земјата и чекорите за решавање на спорот со името.
Министрите за надворешни работи на ЕУ утре, вторник, ќе го усвојат својот заклучок за Македонија и во кој се набројани реформите што се очекуваат од нашата земја за да може да се разговара за почеток на преговори за членство.
ЕУ изразува “сериозна загриженост поради растечката политизација на државните институции и растечките недостатоци во однос на независноста на судството и слободата на медиумите”, се вели во заклучокот што на крајот на неделата треба да го усвојат европските лидери на својот самит.
Самитот исто така ќе заклучи дека “неуспехот да се постигнат овие цели ја нарушува трајноста на реформите” и додава дека од Македонија се бара “брзо да превземе одлучна акција за решавање на овие проблеми”.
ЕУ смета дека “политичката криза помеѓу владата и опозицијата покажала потреба за поконструктивен и инклузивен политички дијалог” и додава дека одговорноста за тоа паѓа на владата и на опозицијата кои мораат да обезбедат политички дијалог кој треба да се води во Собранието.
Меѓутничките односи во Македонија исто така не се оценети со висока оценка. ЕУ смета дека е потребно да се изгради поголема доверба помеѓу заедниците а “ревизијата на Охридскиот договор треба брзо да биде комплетирана и нејзините препораки спроведени”.
Се разбира, ЕУ потсетува на потребата да се реши спорот со името за што е “потребна силна акција”. “Потребно е долгорочните дискусии за проблемот со името да бидат без одлагање доведени до конечен исход”, ќе ни порачаат лидерите на ЕУ.
Во доменот на добрососедските односи ЕУ бара исто така високите средби помеѓу Македонија и Бугарија да вродат со конкретни акции и резултати.
Лидерите на ЕУ ја прифаќаат оценката на Европската комисија (ЕК) која во октомври заклучи дека “политичките критеруми се доволно исполнети поради кумулативниот напредок” и бележи дека ЕК ја повторила препораката за старт на преговори за членство со Македонија.