Европските социјалисти со голема загриженост гледаат што се случува во Македонија и обвинението против Зоран Заев за шпијунажа и закани против владини официјални лица.
Социјалистите велат дека сето тоа се случува една недела пред Заев да ги објави доказите за распространето прислушкување и изборен фалсификат од страна на македонската влада.
«ЕУ веќе искажа критика за актуелната влада и овие обвинувања се индикативни за она што може да се опише како «селективна правда и зајакната политизација», рече престедателот на европските социјалисти Сергеј Станишев.
Тој вели дека земјата постојано е предупредувана, од ЕУ и од ОБСЕ кои бележат дека избирачите биле заплашувани и за индиректната контрола на владата врз медиумите за време на изборите во април.
Во здрава демократија, вели Станишев, опозицијата треба да може да ја работи својата работа во целосна слобода и без било какви рестрикции: «СДСМ одби да учествува во работата на Собранието по изборите бидејќи не можат да работат слободно под вакви услови кои личат на авторитаризам. Оттука императив правната држава, поделбата на власта и независноста на судството да бидат целосно почитувани во овие обвинувања».
Реакција стаса и од групата на социјалистите во Европскиот парламент. И тие искажуваат сериозна загриженост опишувајќи како премиер во саботата на телевизија го обвинил лидерот на опозицијата за шпијунажа и закани против високи функционери со што го загрозил уставниот ред.
Реакцијата ја потпишуваат Кнут Флекенштајн, потпредседател на социјалистичката група и Ричард Ховит, поранешен известувач за Македонија во Европскиот парламент.
Двајцата, во име на социјалистите, велат дека се загрижени поради политичкото влијание врз судски процеси и селективната правда. Повикуваат на независна и транспаретна истрага за обвинувањата со тоа што треба да се земат во предвид сугестиите за зајакнување на правната држава дадени во извештајот на Европската комисија.
«Слушнавме контрадикторни изјави од премиерот и министерството за внатрешни работи: тој вели дека осомничените веќе се обвинети додека а другата изјава вели дека обвинителството се уште разгледува што да направи».
Ховит и Флекенштајн забележуваат исто така дека медиумите што го контролира владата не ја емитувале прес конференцијата на Заев кој на неа одговорил на обвинувањата: «Оттука ја повикуваме владата да обезбеди објективно и транспаретно медиумско покривање за обвинетите за време на истрагата. Тоа е минимумот за да можат да се бранат пред јавноста», велат социјалистите од Европскиот парламент.