Во 2012 година 36-те најголеми суверени или државни финансиски фондови, или фондови на добра, располагаа со вкупно богатство од 5 билиони (илјади милијарди) долари. На листата доминираат фондовите чии пари потекнуваат од нафта и гас.
Нешто над 57 отсто од овие 5 билиони долари потекнуваат токму од експлоатација на овие два енергенси.Азија е најголем регион според вкупната вредност на овие фондови, зашто 40,5 отсто парите потекнуваат оттаму, а на второ место е Блискиот Исток од каде што потекнуваат 35,6 отсто од парите.
Првиот суверен финансиски фонд беше основан во 1953 година од парите од извадената нафта во Кувајт и тој е создаден уште пред земјата да се стекне со независност од Велика Британија. Овој фонд сега вреди 300 милијардидолари и е на седмо место на долниот графикон. Од 2000-тата година наваму бројот на суверени финансиски фондови се зголеми драматично.
Катарскиот инвестициски фонд, Qatar Investment Authority, е основан во 2005 година и се наоѓа на 12-то место со 115 милијарди долари. Како што се забележува, станува збор за огромни пари и со оглед на контактите на актуелната власт со катарските шеици, единствено нешто што можеше да им се понуди беше удел во ЕЛЕМ од 49 отсто зашто ниедна друга можна зделка во земјава не е толку голема за да ги задоволи апетитите на волку голема инвестициска институција.
Во земјава, инаку, има само неколку компании со добивка од над 10 милиони евра, од кои најголем дел се банки, а и поголем дел од овие нив веќе се во мнозинска сопственост на странци. Ова значи дека некој од овие фондови малку е веројатно директно да дојдат во Македонија. Она што може да се очекува, евентуално, е нивните пари да дојдат преку посредници што успеале да ги убедат менаџерите на овие фондови да им ги дадат за понатамошно инвестирање.
(Графикон: Sovereign Wealth Fund Institute, од официјални државни извори)
* Вклучени се парите од Стабилизациаскиот нафтен фонд на Русија
** Проценка