Енергетската заедница за југоисточна Европа повторно побара од Македонија да усвои Национален акциски план за обновлива енергија (НАПОЕ). Ова е едно од клучните барања на директивата на Европската комисија од 2009 година која се однесува на промовирање на употребата обновлива енергија која на Македонија може да и донесе енергија која нема да ја загадува околината како што тоа сега е случај.
Ова тело задолжено за адаптирање на снабдувањето со енергија со правилата на ЕУ предупреди дека Македонија треба да го усвои овој НАПОЕ во наредните два месеци. Доколку тоа не биде направено во фиксираниот рок, Секретаријатот на Енергетската заедница ќе го изнесе случајот на министерско ниво кое треба да ја санкционира Македонија.
Според оваа европска директива земјите се обврзале да реализираат национални цели за обновлива енергија најдоцна до 2020 година. За да може да дојде до исполнување на обврските кои Македонија ги презела потребно е да се направи споменатиот Национален план. ЕУ е подготвена да помогне во реализацијата на овој план. Од тие причини од Македонија се бара да го направи овој план.
Освен Македонија, ваква опомена добија и Албанија и Босна и Херцеговина.