Најавата за затворање на балканската рута синоќа по словенечката одлука повеќе да не прима бегалци е порака до сите кои тргнуваат кон ЕУ дека по овој пат повеќе нема да поминат. Во Европскиот парламент (ЕП) критиките за евро-турскиот договор утринава беа без милост за земјите членки.
Словенечкиот премиер Миро Церар изјави дека «балканскиот пат за нелегалната имиграција повеќе не постои».
Овој словенечки потез беше веднаш имитиран во Хрватска, Србија и Македонија. Границата е отворена само за хуманитарни исклучоци и за оние кои во Словенија имаат намера да побараат азил. Според експеритите, станува збор за многу мал број луѓе помеѓу 850.000 лица кои стасаа од Турција во Грција во текот на изминатите месеци.
Одлуката на Љубљана прави притисок врз ЕУ која ќе мора брзо да најде конечен договор со Турција. Во меѓувреме, невладините организации се шокирани од пред-договорот со Турција кој треба да се финализира на 17 март. Договорот предвидува Турција да ги прими назад сите мигранти кои нелегално стасале во Грција вклучително и Сиријци кои бегаат од војна а ЕУ зема обврска за секој еден од овие луѓе да земе на територијата на ЕУ еден бегалец од тие кои се во Турција.
Негативни реакции вчера дојдоа и од УНХЦР кои се загрижени за каков било договор што вклучува неселективно враќање на сите поединци од една земја во друга без доволно нагласени заштитни механизми за бегалците во согласност со меѓународните обврски, реагираат од седиштето на УНХЦР во Женева.
Во ЕП утринава се одвиваше долга и исклучително остра дебата за исходот на бриселскиот самит помеѓу Анкара и 28те лидери на ЕУ.
Шефот на либералната група, екс белгиски премиер Ги Верхофштад го нападна пред-договорот помеѓу ЕУ и Турција велејќи дека “ние му ги дадовме клучевите на Европа на султанот Ердоган”.
Речиси сите политички групи во ЕП беа критични од резултатот на понеделничкиот самит а единствената политичка група која го бранеше договорот беа демо-христијаните.
Манфред Вебер, шеф на оваа група на која и припаѓа и германската канцеларка Ангела Меркел, рече дека е задоволен од исходот. Сепак, тој додаде дека 6 милијарди ветени на Турција не се отворен чек кој може да исполнува желби бидејќи овде станува збор за соработка.
Турскиот премиер Ахмет Давотоглу во понеделникот вети дека ниту еден цент нема да биде потрошен за турските граѓани и дека сите пари ќе бидат искористени за бегалците.
Но, другите групи не штедеа критики. Верхофштад, видно изнервиран, побара од претседателот на ЕУ Доналд Туск да си ја провери “домашната задача” до следниот самит на 17 март кога договорот со Турција треба да прерасне во финален договор.
– Ние, Европјаните, го блокираме приемот на сите Сиријци и бегалци кои бараат заштита и сега Турција и Ердоган ќе бидат тие кои врз индивидуална основа ќе одлучуваат кој е политички бегалец и кој не е, кој може да оди во Европа е кој не, рече либералот и додаде дека “очигледно е дека Курдите кои доаѓаат од Сирија или Ирак нема воопшто да можат да ја минат границата”.
За претседателот на социјалистите Џан Питела, хуманитарната ситуација на Грција е драматична и тој стравува дека Грција ќе се претвори во “птичарник за бегалци” на кој има “само влез но не и излез”.
Ко-претседателот на групата на Зелените Филип Ламбертс подвлече дека Европа е во “морален банкрот” и дека ЕУ му ставила “црвен тепих на режимот кој ги замолчува медиумите и ги бомбардира своето население”.