Шефовите на дипломатиите на ЕУ наредната недела ќе донесат заклучок за Македонија со кој ќе изразат загриженост за политичката криза која станува се подлабока.
Освен тоа, идната недела во посета на Македонија и разговори со власта, опозицијата и граѓанското општество ќе допатуваат претставници на земјите членки. Во досегашната работа со земјите кандидати за членство ЕУ немала вакво искуство и целта на оваа посета е самите да ја оценат длабочината на кризата и да помогнат да се најде начин за нејзино решавање.
Засега не е познато кои земји ќе бидат дел од оваа посета.
На иницијатива на Словенија, на која и се придружија уште десетина земји членки пријатели на Македонија, неделава во Брисел се подготвува заклучокот кој идната недела ќе го усвојат министерите на нивната редовна средба во Луксембург. Покрај Словенија во групата земја се наоѓаат Шведска, Австрија, Бугарија а најверојатно дека ним ќе им се придружи и Грција.
Според дипломатските извори на НОВА, заклучокот треба да ја изрази сета европска загриженост за политичката криза од која Македонија не само што не успева да се извлече туку во неа влегува се подлабоко. Советот на ЕУ ќе побара од Македонија да најде политичко решение на овој политички ќорсокак а од Советот на ЕУ ќе се побара да ја следи ситуацијата и да се наврати на прашањето во најскоро време.
Советот најверојатно нема да побара од СДСМ да прекине со објавување на “бомбите” ниту пак ќе побара опозицијата да се врати во Собранието без околу тоа да биде направен договор со власта.
Се очекува исто така дека Советот на ЕУ ќе ја поздрави работата на европската парламентарна тројка кој утре го одржува вториот состанок со претставници на СДСМ и ВМРО-ДПМНЕ.
Точната формулација на идниот заклучок би требало да биде позната до крајот на оваа недела.
Според изворот на НОВА, ЕУ почнува да го губи трпението поради настаните во Македонија и неспособноста на политичките сили сами да креираат услови за излез од кризата и да тргнат по пат на преговори.
Според дипломатскиот извор на НОВА, ЕУ засега нема намера да именува посебен пратеник за Македонија кој би добил мандат да посредува помеѓу политичките партии, иако овој предлог доаѓа од повеќе дипломати и аналитичари кои внимателно ја следат македонската криза.
Инаку, словенечката инцијатива беше предложена во петокот а идниот заклучок ќе биде усвоен без дебата помеѓу министрите на ЕУ. Ова е прво предупредување до Македонија дека е време да се тргне во решавање на кризата пред ЕУ да се одлучи за подрастични чекори.