Италијанот Лука Волонте, лобистот на ВМРО-ДПМНЕ, прифатил милиони евра од владата на Азербејџан за да ја брани оваа земја во Советот на Европа, паневропското тело со седиште во Стразбург чија основна задача е да се бори токму против корупцијата и заштитата на човековите права во неговите 47 земји членки помеѓу кои и Македонија.. Италијанското обвинителство отвори истрага за овој случај.
Волонте беше претседател на политичката група на демохристијаните, Европската народна партија во која членува и ВМРО-ДПМНЕ.
Според конзорциум европски весници, британскиот Гардијан, францускиот Ле Монд, германскиот Зуддојче Цајтунг, данскиот Бизнис власта во Азербејџан имала таен фонд од 2,9 милијарди долари за мито за европски лобисти, политичари, новинари и бизнисмени. Тие требало да лобираат и да шират позитивни пораки за Азербејџан и власта во оваа земја и да ги блокираат негативните извештаи за наместените изборите, за корупцијата и за политичките прогони и насилства врз опозицијата и новинарите во Азербејџан во Советот на Европа. Парите се пренесувале преку мрачни компании кои имале седиште во Велика Британија, а до нив ги пренесувала Данске Банк, преку нејзината филијала во Естонија.
Денес Телма објави можна македонска вмешаност во овој корупциски скандал. Според Телма, на сметка на поранешен македонски фудбалер “завршиле дел од 2,9 милјади долари, пари со кои меѓу другото владејачката елита поткупувала новинари и европски политичари, тврди романскиот новинар Пол Раду. Дел од овој скандал што го објавија повеќе светски медиуми, според него, е и компанија блиска до претходната македонска влада”. Името на фудбалерот не се открива но романскиот новинар тврди дека тоа наскоро ќе биде објавено.
И Советот на Европа почна своја истрага за тоа, кој и како гласал во Собранието во 2013 година за резолуцијата за Азербејџан.
Холандскиот пратеник Питер Омцигт е помеѓу иницијаторите за оваа истрага. Тој вели дека Советот на Европа конечно тргна во расчистување на овој случај во кој токму вмешаноста на Волонте покажува дека во оваа пан европско тело има “системски проблем”.
Азербејџан е член на Советот на Европа од 2011 година и од 2012 година кон него впери прст невладината организација Европска иницијатива за стабилност укажувајќи ја можна широка корупција и милионско мито исплатено до европски пратеници од Парламентарното собрание на Советот на Европа (ПССЕ), на ова тело чија задача била да го бранат Азербејџан и да не дозволат гласање на критични извештаи за оваа земја. Така, во 2013 година не беше изгласан извештајот за политичките затвореници во Азербејџан. Азербејџан е познат по затворање новинари, тортура во затворите, случаи на исчезнати борци за човекови права… Новинарите кои ја критикуваат власта се често заплашувани, затворани или физички напаѓани.
Лука Волонте во повеќе наврати пишуваше позитивни текстови за ВМРО-ДПМНЕ и ја критикуваше СДСМ која тогаш беше опозиција. Неговите текстови беа објавувани на сите медиуми блиски до власта како Сител, Курир, Република но и на јавниот сервис Македонската радио-телевизија.