Турбулентна година за Македонија. Дебатите во Европскиот парламент (ЕП) постојано се повторуваат со барање за преговори а политичката ситуација во земјата постојано се влошува. Статус кво ситуацијата не помага и постои опасност таа да стане хронична и да излезе од границите на Македонија.
Кусиот говор на хрватскиот пратеник Тонино Пицула совршено ја илустрира дебатата која во средата попладне се одржа на пленарната сесија на ЕП во Стразбург.
За Македонија беа издвоени нешто повеќе од еден час дебата на која тема беше резолуцијата за нашата земја на словенечкиот либерал Иво Вајгл. Резолуцијата ќе биде ставена на гласање утре, четврток. Во Резолуцијата се бара отворање на преговори за членство со Македонија но се очекуваат фер избори за да може ЕУ да ја повтори и потврди препораката за преговори.
Пицула потсети дека илегалните прислушувања на илјадници граѓани, закани до новинарите, раширената корупција и честото преплетување на државничките и партиските активности кои резултираа со длабоки поделби без политички дијалог.
Претставничката на Советот на ЕУ во воведот рече состојбата во земјата е критична, политичката криза упорно трае, слобода на изразување не е на високо ниво и Европа е сериозно загрижена. Според неа, Пржино е вистинскиот одговор а витално е изборите од 5 јуни се прв значаен чекор кон подобрување на состојбата. Во име на Советот на ЕУ таа побара независна истрага за кумановските настани, активна Анкетна комисија за прислушувањето и поддршка за Специјалната обвинтелка.
Комесарот за проширување Јоханес Хан потсети дека е потребна примена на извештајот на Прибе и додаде дека меѓуетничката ситуација во Македонија не е добра и инсистираше дека е потребно брзо да се направи ветениот преглед на Охридскиот договор.
Ричард Ховит, еден од пратениците медијатори во политичката криза потсети дека САД и ЕУ не се согласуваат со тврдењето на ВМРО-ДПМНЕ дека имало договор токму со меѓународната заедница дека нема да има нови реформи во медиумите:
«Ние укажавме јавно дека тоа не е дел од ниту еден договор», рече Ховит.
Ховит подвлече исто така дека ставот на Советот и Комисијата, со поддршка од Европскиот парламент, е дека мора да има напредок во итните реформи односно реформите наведени во извештајот на Прибе. Досега ништо не е направено во таа насока па дури и Европската комисија тврди дека Македонија не оди напред туку постојано назадува.
Помеѓу пратениците кои се јавија за збор имаше многу поддршка за работата на Специјалното обвинителство кое треба да ги истражи соменијата за злоупотреби од страна на политичарите. Ховит рече дека Катица Јанева, специјалната обвинителка, им кажала на пратениците медијатори дека не добива поддршка од судскиот систем во земјата.
За жал, немаше многу пофални зборови за Македонија денес во ЕП. Само хрватската пратеничка Маријана Петир, основач на групата Пријатели на Македонија во ЕП, се жалеше што изборите се одложени бидејќи тоа го барале тие што сакаат да владеат без избори.
Една од главните пораки упатени од ЕП беше остра. Таа вели дека политичарите во Македонија не ги исполнуваат нивните обврски и нема да можат вечно да ги избегнуваат задачите кои им претстојат и на кои самите се обврзале со потписот на Договорот од Пржино. Примена на овој договор води до фер избори.
Бегалската криза беше исто така во сите изјави на европските пратеници. Некои беа загрижени поради тоа што Македонија е мала земја и нема капацитет да се справи со толкав број бегалци, други беа задоволни што Македонија успева да ја менаџира оваа криза а некои беа критични поради информациите за насилство врз бегалците од страна на некои припадници на полицијата. Но сите инсистираа на солидарност со Македонија во оваа бегалска криза.
Се разбира, за време на целата дебата дежурните грчки пратеници постојано ја прекинуваа дебатата, бараа збор и ја критикуваа употребата на нашето уставно име. Најчестиот одговор што го добиваа беше дека – да, според Обединетите Нации името е ПЈРМ но пратениците од земјите членки кои нашата земја ја признале како Република Македонија никој нема да ги спречи да го користат уставното име.