Зборувајќи пред лидерот на СДСМ, Зоран Заев, највисоките претставници на партијата и членството, тројката Ричард Ховит, Кен Хорстет и Џакомо Филибек на денешниот Конгрес на социјалдемократите им изразија поддршка за претстојните избори во декември.
Поранешниот известувач за Македонија, пратеникот во Европскиот парламент, Ричард Ховит, смета дека глас за СДСМ на следните избори, е глас за иднината на граѓаните.
„Глас за СДСМ претставува глас за образование, глас за работни места, глас за подобрување на животниот стандард…глас за партија која сака да ги зближи граѓаните без разлика на нивните различности“, порача Ховит, дополнувајќи дека е горд на начинот на кој лидерството на СДСМ се справило со политичката криза во Македонија.
„Зоран Заев, Радмила Шеќеринска, внесовте боја во македонската политика“, им рече Ховит.
Европскиот пратеник апелираше и до сите партии да се држат до договореното од Пржино за да се истражат индициите за злоупотреби бидејќи како што вели, Европа сака да биде партнер на земја која ги споделува заедничките вредности. Пратеникот на Кралството Шведска, Кен Хорстет, на Конгресот се осврна на моделот според кој неговата земја е една од најбогатите во светот денеска.
„Успеавме бидејќи не оставивме никој зад нас, тоа е духот на социјалдемократите и затоа денес сме една од најбогатите земји. Стоиме зад СДСМ, стоиме зад Специјалното јавно обвинителство, не смее да има притисок во истрагите на СЈО“, порача Хорстет.
Зборувајќи пред присутните пак, заменик генералниот секретар на Партијата на европските социјалисти, Џакомо Филибек, иронично порача дека контроверзниот Силвио Берлускони во споредба со екс премиерот Никола Груевски е аматер.
„Видов во минатото многу пари потрошени на непотрбни работи. Скандалот со прислушувањето покажа дека институциите кои треба да ги штитат правата на граѓаните – самите ги прекршиле. Тоа не го очекувавме од една европска земја. Силвио Берлускони е аматер во споредба со Никола Груевски“, рече во својот говор Филибек.
Конгресот на СДСМ е во тек, на кои обраќања се очекуваат од раководните структури на партијата и претседателот на СДСМ, Зоран Заев.
Присутни се 539 делегати, односно 74 отсто од вкупниот број делегати на партијата, како и екс лидерот а партијата Бранко Црвенковски.
