Издавачката куќа “Феникс“ и Фондацијата “Македонија презент“, четврти пат ги соопштија добитниците на меѓународната награда “Ана Франк“ за литература за деца и млади за 2013 година. Добитници се Дејан Алексиќ од Република Србија, Катја Ерменкова од Бугарија и Виолета Димова од Македонија.
Дејан Алексиќ е еден од најзначајните книжевни творци од помладата генерација во Србија. Посебно место во неговото творештво зазема литературата за деца. Тој е добитник на голем број награди за литература за деца.
Катја Ерменкова е родена и живее во Сандански и е член на Сојузот на бугарските писатели. Автор е на повеќе поетските книги. Нејзините песни се преведени на македонски, српски, полски, украински, руски, англиски и албански јазик. Во Македонија и е објавена книгата Избрани песни. Уредник е на книжевното списание Ирин Пирин, како и на Издавачката куќа Мелник. Основач е на меѓународната поетска манифестација Мелнички вечери на поезијата.
Виолета Димова е декан и редовен професор на Филолошкиот факултет на Универзитетот Гоце Делчев во Штип. Таа, освен со методиката, се занимава со естетиката на комуникацијата во наставата по литеартура. Нејзината најнова книга “Естетиката на комуникацијата и литературата за деца“ е обид за нов и поинаков литературно-теориски и апликативен пристап кон делата кои се наменети на децата и на младите.
Наградата “Ана Франк“ на добитниците ќе им биде врачена на Меѓународниот саем на книгата во Скопје, кој годинава ќе се одржи од 9-15 април.
Инаку, претходни добитници на меѓународната награда “Ана Франк“ се: писателката Криста В. Јохансен од Канада, Тиодор Росиќ и Стана Смиљковиќ од Србија.