По шест месеци и десетици одржани рочишта, денеска во Кривичниот суд Скопје ќе бидат објавени пресудите во случајот „Рекет” во кој првообвинет е Бојан Јовановски – Боки 13, а второобвинета е поранешната шефица на Специјално Јавно Обвинителсство (СЈО), Катица Јанева. Во текот на овој судски процес беа презенитрани низа материјални и вербални докази, а кон крајот на минатиот месец со завршни зборови се произнесоа обвинителката Вилма Рускоска и адвокатите на одбраната и обвинетите.
Текот на предметот предизвика голем интерес во јавноста, често изјавите на сведоците, обвинетите или обвинителството беа теми на денот. Поради големиот медиусмки интерес Основниот кривичен суд одлучи пресудата да биде објавена во големата сала на Врховниот суд.
Во описот на обвинителниот акт покренат од Обвинителството за борба против организиран криминал и корупција, се вели дека обвинетиот Бојан Јовановски влијаел врз обвинетата Катица Јанева за таа да донесе поблаги мерки против Јордан Камчев, обвинет во предметот „Империја”, случај кој го почна поранешното СЈО.
Јовановски и Јанева во своите завршни зборови пред судот негираа вина и рекоа дека не го сториле делото за кое се товарат. Обвинителството, според нив, не изнело докази за делото за кое ги товари и дека целото обвинение е врз основа на исказ на еден сведок – кој е оштетен во случајот. Целиот случај за Јовановски е политичка конструкција, додека за Јанева е клевета.
Судењето за предметот „Рекет” почна на 3 декември минатата година. Обвинението беше поднесено против три лица. На првото рочиште за овој случај обвинетитот Зоран Милевски-Кичеец ја прифати вината и веќе наредниот ден беше осуден на три години затвор. Јовановски и Јанева, пак, се изјаснија невини и против нив се водеше судска постапка во која беа презентирани низа материјални и вербални докази од страна на Обвинителството.