Алексис Ципрас синоќа, во договорениот рок, го достави планот за реформи за да може Грција да добие 50 милијарди евра од Европскиот механизам за стабилност (ЕМС) за период од три години.
Планот на Атина е сличен на тој од 25 јуни, план што тогаш го презентираа кредиторите и кој беше отфрлен на референдумот на 5 јули.
Грција предлага ДДВ од 23 отсто за рестораните и намалено ДДВ од 13 отсто за хотелите, основните прехрамбени производи и енергијата. На островите ќе биде постепено избришано намалувањето на ДДВ од 30 проценти со тоа што ќе се почне од најбогатите острови.
Пензиите се важен дел од оваа програма. Се планира намалување на трошоците од 0,25 отсто до 0,5 отсто од бруто националниот производ (БНП) во 2015 година и од 1 процент од БНП во 2016 година. Во пензија ќе се оди на 67 години од 2022 година. Владата бара бришење на додатокот на пензија за најниските пензии од 2019 година наместо 2018 година. Додатокот на пензиите ќе биде замрзнат до 2021 година а здравствените придонеси ќе паднат од 6 на 4 проценти.
Програмата предвидува амбициозни реформи, кои Владата одамна ги има прифатено, за даночната администрација пред се. Реформите на пазарот на труд ќе бидат усогласени според правилата на ОЕЦД.
Предвидено е и покачување на даноците, за фирмите од 26 на 28 отсто како и за бродските компании и луксузните производи. Ќе има и нови приватизации. Воените трошоци ќе бидат намалени за 100 милиони евра годинава и за 200 милиони во 2016 година.
Накусо, мерките треба да заштедат 13 милијарди евра за три години што значи сума поголема за 8 милијарди од првобитниот предлог на Сириза од 22 јуни.
Од политичка гледна точка на Сириза ќе и биде проблем да ги прифати овие мерки.
Според британскиот «Гардијан», ова значи дека Ципрас го толкува резултатот на референдумот како обнова на неговиот мандат и зајакнување на капацитетот на Владата да го направи најдоброто за Грција. Поради недостиг на средства грчката економија е во кома и ситуацијата се влошува секој ден. Ципрас не сака да го превземе ризикот за излегување на земјата од еврото и оттука тој мора да направи важни отстапки.
Но во сето ова има и план за инвестиции. Атина бара од Европската комисија да одмрзне 35 милијарди евра. Овие пари се структурните и земјоделските фондови на ЕУ за Грција кои беа блокирани од Комисијата. Атина бара тие брзо да и бидат ставени на располагање за да се создаде “позитивен шок”кој би ги компензирал мерките на штедење. Ова не беше предвидено во претходните договори.
Втората мерка која би ги компензирала напорите за штедење е реструктуирањето на долгот и токму оваа точка е важна за да може Парламентот да го прифати планот. Текстот предвидува долгот да стане “поднослив”по 2022 година во делот на долгот до европските држави.
Останува да се види дали кредиторите оваа точка ќе ја прифатат. Германскиот министер за финансии вчера изјави дека некакво реструктурирање на долгот е можно но рече исто така дека европските повелби не оставаат голема маргина во тој поглед.
Според францускиот економски весник Ла Трибун, не е сигурно дека Сириза ќе го следи предлогот на Ципрас и прашање е што ќе се случи ако за текстот гласаат само десните и центар десните партии од опозицијата. Тоа може да значи дека Ципрас би можел да го распушти Парламентот или да влезе во коалиција со други партии за да се формира влада на национален спас.
Распуштањето на Парламентот може да ги блокира преговорите во Брисел што значи дека би почнала процедурата за Грексит. Владата за национален спас би значела победа на Брисел и Берлин кои одамна не кријат дека ова сценарио би било добро.
Накусо, финансиското гушење на земјата ги избриша резултатите на референдумот од 5 јули.