Финиширан првиот албум на бендот „Рипортерс“, составен исклучиво од македонски новинари, којшто содржи седум рок-песни, меѓу кои и веќе познатите „Слобода“ и „Пушти глас“. Официјалната промоција е закажана за 3. мај.
Парите од продажбата на цедето и од концертите ќе бидат наменети за солидарниот фонд, кој веќе го формираше новинарскиот синдикат ССНМ и кој ќе се користи за помош на новинарите и на медиумските работници во неволја.
„Рипортерс“ го сочинуваат вокалистот Петрит Сарачини, Борјан Јовановски -тапани, Миле Бошњаковски свири на бас-гитара,Стојан Трпчевски – вокал и клавијатури, Жарко Димитриоски – соло гитара, Драган Антоновски – ритам-гитара. Како гостин на песната „Пушти глас“, дел од тапаните ги свири и новинарот на „Телма“ Панта Џамбазовски, инаку првиот тапанар на „Архангел“.
По промоцијата се планирани седум настапи низ градовите во Македонија, а парите од влезниците и од продажбата на дискот влегуваат во солидарниот фонд на ССНМ. Целиот проект е поддржан од амбасадата на САД, а го реализираат „Рипортерс“ и ССНМ.