Фондот за здравстено осигурување ќе им ја олесни процедурата за подигање на електронски здравствени картички на фирмите кои имаат над 100 вработени, а досега не ги подигнале картичките.
Од Фондот информираат дека нивни вработени ќе посетат 110 фирми и ќе им ги достават електронските картички. Оваа новина се воведува со цел да се забрза процесот и да можат што поскоро осигурениците да ги користат здравствените услуги со воведувањето на новиот здравствен систем „Мој термин“ со кој рецептите и специјалистичките упати се добиваат преку здравствената картичка.
Невработените кои се пријавуваат во Агенцијата за вработување исто така ќе ги добиваат картичките преку Агенцијата при следното пријавување на шалтерите.
– Сите оние кои се приматели на парична помош и кои имаат обврска еднаш месечно да се јават во просториите на Агенцијата, картичките ќе можат да ги подигнат таму. Сите оние кои сè уште не аплицирале за оваа услуга, ќе можат да аплицираат таму, а Агенцијата ќе ни ги достави информациите за да ги процесуираме изјави директорот на Фондот, Јован Грповски.
Во оваа група спаѓаат околу 25 000 осигуреници на Фондот. Граѓаните кои што имаат уплатено за електронска картичка, останува можноста истата да ја подигнат кај своите матични лекари. Пензионерите, пак, над 70 години можат да побараат преку дежурните телефони картичката да им се достави дома.
Сепак, праксата покажува дека оваа процедура оди бавно , лекарите сеуште не се во можност да ги подигнат и да ги дистрибуираат картичките на сите пациенти, туку тоа оди етапно. Ова за НОВА го потврдија неколку матични лекари од различни амбуланти во Скопје.
Околу 615 000 граѓани ја добиле својата електронска картичка, 360 000 картички се изработени и треба да се дистрибуираат, 380 000 картички се во процес на изработка во фирмата која ги подготвува, а 110 000 барања се во процес на изработка во Фондот.
Планиране е 1 465 000 осигуреници да се стекнат со еелктронски здравствени картички. Елекронската здравствена картичка засега има само една функција, да ги замени сините картони. Пациентите и понатаму треба да ги носат здравствените легитимации кога ќе одат на лекар.