Во рамки на фестивалот „Прво па женско“,и со мотото „Женско писмо“, вечерва во Младинскиот културен центар во Скопје се одржа поетско читање на кое поетеси, писателски, активисти и активистки, како и љубители на поезијата,се собраа на едно место за, како што тие велат – женското писмо да го донесат во стварност.
Активистката Билјана Гинова, една од организаторите на настанот кој се одржува на Меѓународниот ден на жената – 8. Март, вели дека овој настан е можност да се слушне за творештвото на поетесите кои се „чувани во фиока“.
„Целта на овој настан е да се даде простор на поетесите кои се помалку издавани, чувани „во фиока“, поттиснати од општеството. Минатата година на настанот слушнавме дела само на домашни поетеси, и дури и многу од авторките дојдоа да споделат свои песни со публиката. Оваа година го проширивме спектарот и со дела на странски поети, а за потребата од овој настан и положбата на жените во македонското општество, можеби вистинското прашање е зошто жената е на маргините, како тоа да се промени, на кој тоа му одговара жената да биде објект-родилка на децата и негувателка на „домот на нацијата“ истакна активистката Гинова.
Со поетски парчиња посветени на жената, во МКЦ вечерва настапија Славица Диневска, Биљана Секуловска, Ана Василева, Јана Јакимовска, Уранија Пировска, Ана Мишковска –Кајевска, Татјана Качоровска, Rinna Weasley Јанкуловска, Јасмина Василева, Ана Мартиновска, Дороти Пачкова, Ангелика Апсис, Мартина Трајкова, Јана Коева, Кристина Леловац, како и Кочо Андоновски, Мариглен Демири, Новица Наков и Никола Шунде.
Според директорката на Хелсиншкиот Комитет – Уранија Пировска, фестивалот го отвора протсторот за потранспарентна борба против како што таа вели „фалусоидната доминација“.
-Денес повторно, за жал мораме да се бориме за права кои некогаш ги сметавме за освоена територија. Денешната власт со своите политики дури навлегува во правото на избор на жената, нејзината привилегија и ја позиционира само како објект за репродукција, рече Пировска.
Уранија Пировска
-Сè што некогаш било ерес – станува догма, вели активистката Ангелика Апсис.
Ангелика Апсис, Никола Шундре
-Системско газење врз женските права и неопатријархатот кој се наметнува во мејнстримот во разни форми, неминовно бара да поттикнеме нов бран на еманипација, слична на таа во и по НОВ. Но,борбата не треба само да за да го вратиме одземеното, туку да добиеме се што ни припаѓа, смета активистката Павлина Симоноска.
Павлина Симоноска
Фестивалот „Прво па женско“ се одржува по трет пат.