Скопје претпладнево е обвиткана во магла, сообраќајот се одвива непречено но, забавено, градскиот сообраќај се одвива со задоцнување.
АМСМ препорачува внимателно возење, прилагодена брзина на движење и почитување на поставената сообраќајна сигнализација. Посебно внимание е потребно на делниците кои минуваат низ клисурите и засеците, особено на патните правци Катланово-Велес, Маврово-Дебар-Струга, Демир Капија-Удово, Кочани-Делчево и Берово-Виница, каде е можна почеста појава на одрони.
Поради ниските температури можна е појава на голомразица на некои повисоки планински и осојничави места.
Намалена видливост поради магла: Куманово – 20м, Скопје – 100м, Сарамзалино – 30м, Неготино – 200м, Д.Капија – 70м, Петровец – 50м, Кула – 50м.
Во текот на денот се очекува разведрување во скопската котлина со умерена облачност. Минималната температура ќе достигне до минус пет, а дневната ќе се искачи до пет степени, се вели во извештајот од Хидрометеоролошкиот завод. Утринската температура ќе се движи од минус девет до минус два, а дневната од пет до 11 степени.
Смогот и маглата се веќе над една недела причина за малата видливост и во централните подрачја на главниот град. Граѓаните секојдневно бараат од надлежните институции да преземат конкретни мерки, а невладините организации упатуваат и молби до граѓаните и тие да преземат она што е во нивна моќ и да помогнат да се подобри ситуацијата со нискиот квалитет на амбиентен воздух во главниот град на Македонија.
Според прогнозата во следните денови се очекува стабилно и суво време со слабо изразено воздушно струење. По одделни котлини ќе има појава на утринска магла и ниска облачност.