Тимот на Армијата за пребарување и спасување кој вчера во доцните
попладневни часови пристигна во Карахкамраш која е една од областите кои се
најповеќе погодени од катастрофалните земјотреси кои се случија во Турција, во
текот на денешниот ден ги отпочна активностите за пребарување и извлекување
на жртвите.
Армискиот тим составен од 24 припадници од составот на
Баталјонот за специјални сили и двајца инструктори од Командата за обука и
доктрини со две службени кучиња заедно со сите вклучени го пребаруваат теренот
во градот Кахраманмарас и пожртвувано се ангажираат на пронаоѓање и
извлекување на евентуално преживеаните кои се наоѓаат во рушевините, соопшти попладнево Армијата на Северна Македонија.
Се додава дека армиските припадници на теренот ја искажуваат својата одлучност и обученост професионално да ја извршат задачата и да го дадат максимумот во пронаоѓање на настраданите и на секој можен начин да помогнат на граѓаните на сојузничка Турција.
Надеж дека во текот на пребарувањето ќе се спасат човечки животи каде
секој момент е драгоцен, даваат и службени кучиња од расата белгиски овчар и
лабрадор, кои заедно со инструкторите се обучени токму за пронаоѓање лица во
елементарни непогоди.
