Министрите за внатрешни работи на ЕУ денеска во Брисел ќе се обидат да распределат 160.000 баратели на азил во сите земји членки. Но, задачата е тешка со оглед на противењето на многу земји, како Унгарија, Чешка и Словачка, да учествуваат во оваа распределба на бегалците.
Доколку денес не биде донесена одлука, ЕУ најавува специјален самит посветен на ова прашање пред крајот на овој месец.
Шемата за распределба на бегалците се однесува пред се на Сиријци и Ирачани кои во ЕУ стасале од 15 август 2015 година до 16 септември 2017 година. Државјаните на овие две земји имаат големи шанси да добијат азил во ЕУ. Оние кои во ЕУ стасале пред 15 август оваа година потпаѓаат под правилата на Даблинската регулатива според која бегалците ќе треба да побараат азил во првата земја на ЕУ во која влегле а тоа значи најчесто во Италија, Грција и Унгарија.
Но најсериозниот дел од министерската дебата денес ќе биде посветен на унгарската најава дека земјата не сака да прими бегалци иако илјадници секој ден таму влегуваат. Наместо тоа, од утре треба да стапи на сила унгарскиот закон според кој секое илегално поминување на границата ќе биде казниво со затвор или враќање на бегалецот во земјата од која влегол во Унгарија а тоа значи враќање во Србија. Унгарија исто така на својата граница крева ограда од бодликава жица.
Вчера претседателот на Европската комисија (ЕК) Жан-Клод Јункер му се јавил на унгарскиот премиер Виктор Орбан и се обидел да дојде до договор со него. Но, како што јави Ројтерс, овие преговори пропаднале.
Австрискиот канцелар Вернер Фајман рече дека неговата земја можеби ќе може да ги земе бегалците кои Унгарија ги одбива и дека нема да воведе контроли на границата со Унгарија. Фајман исто така предупреди дека е можно да се воведат санкции за земјите кои одбиваат да примат бегалци.
Франција има намера да постапи како Германија и да започне контроли на границите но и дека ќе бара од ЕУ на бидат воведени контроли на сите граници на ЕУ, изјави денес претседателот Франсоа Оланд.
«Ќе се обидеме да дојдеме со заеднички заклучок во ЕУ кој ќе дозволи Европа да ги почитува своите граници. Конкретно тоа значи дека треба да има центри за регистрација во Грција, Италија и Унгарија за да се избегне ова што се случува денес», рече Оланд и најави дека темата ќе биде на министерската маса во Брисел денес.
Истовремено ЕУ денес одлучи да примени воена сила против шверцерите на мигранти во рамките на својата операција во Медитеранот. Мерката треба да почне да се применува на почетокот на октомври.