Цел натпревар му беше потребен на Работнички да слави на гостувањето кај аутсајдерот Тре Пене. Дебармаалци на крајот славеа со 1:0 против претставникот на Сан Марино во првиот меч од првото квалификациско коло за Лига Европа за формален реванш во тренинг центарот „Петар Милошевски“ при ФФМ по седум дена. Стрелец на единствениот погодок на стадионот „Серавале“ беше Дејан Митрев во 90 минута по корнерот што го изведе Ерера.
Третопласираната екипа во македонското првенство за минатата сезона беше подобар ривал на теренот. Имаше иницијатива, создаваше шанси, се закануваше, но радост дочека по прекин. Работнички се обиде десет пати да погоди, а до победоносниот гол изведе уште 13 удари од аголот меѓутоа домашните успеваа да одолеат и да држат тензија до самиот крај. На влезот во судиското надополнување попуштија во концентрација и координација, момент што го искористи стоперот на екипата од Градски парк за триумф.
Подобриот од двомечот меѓу Работнички и Тре Пене во второто коло ќе игра со победникот од Динамо Минск и Рунавик од Фарски острови. Белорускиот претставник славеше во првиот меч на домашен терен со 2:1.
Лига Европа, 1 квалификациско коло, прв меч
Тре Пене – Работнички 0:1 (0:0)
Стадион: „Серавале“ во Сан Марино. Гледачи: 200. Гл. судија: Џејсон Ли Барсело. Асистенти: Јохан Вард и Хуан Хозе Влјада Кандилес (сите тројца од Гибралтар). Ж. картони: Гасперони, Мартини, Калцолари (Тре Пене); Најденов (Работнички). Стрелец: Митрев во 90′ за Работнички.
Тре Пене (формација: 4-3-3): Мигани – Мерендино, Роси, Фратернали (Капичиони 84′), Палаци – Гаи, Гасперони, Патрењани – Сантини (Калцолари 72′), Симончели, Морети (Мартини 63′). Тренер: Луиџи Бицото.
Работнички (формација: 4-3-3): Шишковски – Ерера, Рашо, Митрев, Илиев – Најденов (Станковски 81′), Трајчевски, Дурански – С. Сахити (Е. Сахити 73′), Кадриу, Маркоски. Тренер: Виктор Треневски.