Развиорени знамиња, шалови, зурли, тапани, навивачки реквизити и скандирање. Македонија ги дочека своите фудбалски херои. Неколку илјади граѓани попладнево се собраа кај порта „Македонија“ да ги отпоздрават „црвено-жолтите“ кои им приредија ноќ за паметење во четвртокот со сензационалниот триумф над Италија, во Палермо, со 1:0 во квалификациите за Светското првенство. Репрезентативците ги делат 90 минути до Катар во кои во вторник на „Драгао“ во Порто ќе мора да ја пресликаат трпеливоста од стадионот „Ренцо Барбера“ и да демнат шанса за скалп и на „европските Бразилци“, односно Португалците, кога веќе го имаат в џеб на актуелниот европски првак.
Автобусот со македонските фудбалери беше најавен кај порта „Македонија“ околу 18:30 часот, а просторот околу „зборното место“ почна да се пополнува и час порано. Најголем дел со тинејџери, оние кои и најмногу се идентификуваат со момците во црвена комбинација, меѓутоа како се наближуваше тајмингот за средба со популарните „рисови“, така толпата добиваше измиксана возрасна структура. Успехот на националниот тим во четвртокот ретко кој остави рамнодушен крај малите екрани. Ретко кој можеше да поверува на сопствените очи во таа 92 минута дека топката, по ударот на Александар Трајковски, минува крај десната рака на максимално истегнатиот Донарума и завршува зад неговиот грб за шок и неверување во Италија и еуфорија и експлозија од воодушевување во Македонија.
„Еве ги доаѓаат“, викна едно момче со видно разиграни очи и широка насмевка, алудирајќи на автобусот кој сврте кај Градска болница и со полициска придружба се движеше кон фановите кои ги чекаа во простор налик на буквата П зад Портата. Нивното доближувањето беше знак за местење на паметните телефони за правење на некоја фотографија или видео за спомен од незаборавната вечер. Но, и подготовка за оптоварување на гласните жици за „добредојде“ на ликовите кои ја фрлија во очај Италија, а за четири дена ќе излезат на мегдан и на Кристијано Роналдо и компанија.
Репертоарот веќе познат „Ма-ке-до-ни-ја, Ма-ке-до-ни-ја“, „Зига, зага, Македонија, оле, оле“, „Излези момче“… И, секако, „Трајковски Аце“, „џелатот“ на италијанската репрезентација, а можеби и на Роберто Манчини, кој на фудбалскиот свет му покажа дека, условно, и „големите“ се ранливи, но дека и „малите“ можат да боцнат и бидат отровни.
Забавата кај порта „Македонија“ траеше кратко, околу 15-тина минути. По меѓусебното отпоздравување, шесте фудбалери се вратија во автобусот и се повлекоа во хотел на заслужен одмор по исцрпувачкиот настап во Палермо и патот до Скопје и во карантин до заминување на Пиринеите во недела. Единствената желба со која беа испратени беше „и во вторник вака да биде и ве чекаме во среда на исто место“.
Сашко Димовски