Поранешниот евро-амбасадор во Македонија Ерван Фуере излезе со став за ЕУ Самиот и неспомнувањето на Македонија во препораките од страна на Европскиот совет за прв пат од 2005 год.:
-Тоа е за жалење. Мислам дека е одраз на загриженоста на многу земји-членки, иако не го кажуваат тоа јавно, за состојбата со демократијата во Македонија – отсуството на политички дијалог, недоволниот напредок во надминување на штетата од драматичните настани од 24-ти декември. Тоа не е имиџ за една земја – кандидат за ЕУ. Нема алтернатива на политичкиот дијалог, консензусот и почитувањето на слободата на медиумите, изјави Фуере во интервју за Глас на Америка на македонски.
Што се однесува до решение за името, Фуере вели:
-Македонија треба да ги остави емоциите настрана. Многупати сме рекле дека спорот не е за идентитетот, туку за името. Тоа не е фер, но е реалност. Единствениот начин да се реши е преку дијалог. Македонците секогаш ќе бидат Македонци. Жално е ако спорот со името се злоупотребува за собирање на внатрешно-политички поени.
Македонија нема алтернатива за ЕУ, додава Фуере:
– Нема алтернатива (за европската иднина). Секако дека тоа е избор на секоја држава. Но, како што сме виделе низ историјата на европската интеграција, предностите и можностите што се нудат се големи. Се` додека Македонија не започне со преговорите, ќе биде во тешка ситуација. Членството во ЕУ е единственото решение, вели екс евро-амбасадорот во Македонија Ерван Фуере во интервју на ВОА на македонски.