Со транспаренти „Ни во турско не се рушеа цркви“ граѓаните денеска се собраа пред споменикот на Мајка Тереза, во протестот против најавата за измена на Детално урбанистичкиот план на општина Центар, поддршка им дадоа и претставници на МПЦ.
„Во 21. век, во распарчена Македонија, Жерновски сака да урива црква. Ако почне да урива лошо ќе помине“, изјави владиката Агатангел, преренесува А1он.
Од пред споменикот на Мајка Тереза, демонстрантите се упатија кон општината
Иако според демонстрантите промената на ДУП-от би значело престанување на градежните работи и престанок на изградбата на Црквата Свети Елена и Константин, од општина Центар имаат спротивен став.
Тоа не е возможно ниту во теорија, ниту во пракса, велат и од општина Центар и експертите, за Радио Слободна Европа.
Претседателот на Советот на општина Центар Мирослав Шиповиќ вели дека во предлог одлуката за укинување на ДУП-от, воопшто не подлежат за укинување објекти кои се во градба и за кои е издадена документација.
„Одложување на овој моментален детален урбанистички план за кој имаме предлог одлука да се укине, значи само се однесува за објекти или за маркици каде не започнало градење или градењето е во раните фази. А се што е започнато, се што е изградено, се за што има издадено документација дали од Општината или од Министерството за транспорт и врски, тоа воопшто нема да биде предмет на одлуката за поништување на деталниот урбанистички план“.
Со соопштение во јавност денеска се огласи Граѓанска иницијатива „Веритас“. Според нив вчерашната изјава на Андреј Жерновски дека со предложениот дневен ред на Советот на Општина Центар се предвидува враќање на тревната површина, и дека тоа не се однесува на Црквата СВ Елена и Константин преставува свесна лага и се граничи со измама која Жерновски сака да ја протне во јавноста.
„Единствената тревна површина во Малиот ринг е токму местото каде се гради божјиот храм СВ Елена и Константин“, велат од „Веритас“.