Атмосферата во таборот на македонскиот кошаркарски национален тим беше позитивна и во пресрет на денешниот ден, но од денеска дефинитивно се си дојде на вистинско место, откако на тренинзите на „црвено-жолтите“ се приклучи и Тодор Гечевски.
Искусниот центар долго време одолеваше на молбите на луѓето во и околу репрезентацијата за негов камбек во националната селекција, за денеска и официјално да го потврди своето враќање. Тој најпрвин седна на заеднички ручек со директорот Мерџановски и со капитенот Антиќ, по што попладнево се појави и на тренингот на репрезентацијата, ставајќи му се на располагање на селекторот Алеш Пипан.
„Дојде дедо“ – гласно извика капитенот Перо Антиќ по влегувањето на Гечевски во салата „Борис Трајковски“, секако на шега, со оглед на фактот дека токму Антиќ е најзаслужниот што Тоше реши да им помогне на репрезентативните колеги на Евробаскет 2013 во Словенија. Гечевски во свој стил, максимално скромен, напомена дека негова желба е да му помогне на националниот тим да оствари што подобар пласман на следното големо натпреварување.
„Ова е мој прв тренинг со репрезентацијата. Нормално дека сликата од соиграчите што беше објавена вчера не ме остави рамнодушен, мислам дека тоа беше и мала шега, но во секој случај по контактите што ги имав со членовите на националниот тим и на стручниот штаб решив да се приклучам на тренинзите. Воопшто не сум подготвен, бидејќи планот беше на 15 август да почнам со тренинзи со МЗТ Скопје. Сепак, верувам дека има доволно време за да се подготвам доволно, за да можам да помогнам на репрезентацијата со своето искуство на ова големо натпреварување“ – изјави Гечевски непосредно пред почетокот на тренингот.
Извор /Фото: Екипа