Невообичаено топлиот ноемвриски ден беше совршена причина за тетовци да излезат и да ја посетат новата градска плажа во Тетово, се вели во реакцијата на тетовските активисти од иницијативата „Заслужуваме подобро“ кои денеска испратија фотографии покрај реката Пена опкружени со смет.
Благодарение на поплавите кои што се случија во август оваа година, како и посветеноста на градските комунални власти, тетовци за прв пат имаат уникатна можност да уживаат во „благодeтите“ на градската плажа.
Посетителите на плажата се надеваат дека градските власти и комуналните служби нема да интервенираат и дека со квалитетното вршење на својата работа нема да ја уништат истата.
.jpg)
“Сеа од кој ни ја спремија плажава, се надевамо дека у следниов период властите ќе почна да работаа и на преземање на активности со цел да не пиемо вода и да не пиемо воздух кој што ќе не убија, и дека нашите реке нема да бида затрупани со ѓубре, а храната нема да ни биде затруена. Ова е важно пошто природата што смо ја наследиле од нашите предци треба да ја остаемо на потомците. Мие граѓаните на Тетоо едноставно заслужуемо подобро.“ велат активистите.
Тетово се соочува со сериозен недостаток и рестрикции на квалитетна вода за пиење, а воздухот кој што го дишат тамошните жители е еден од најзагадените како во државата така и во Европа со концентрација на ПМ10 честици кои што во одредени денови надминува повеќе од 8 пати од дозволената количина.