Агенцијата за иселеништво на Република Македонија денеска во Скопје ја организира Четвртата по ред Годишна конференција на иселеничките организации.
Како што соопшти организаторот, на конференцијата ќе учествуваат 110 претставници од 155 македонски иселенички организации од Европа, Австралија, Канада и од САД, јавува МИА.
На првиот работен ден ќе се обработува темата: „Чување и негување на македонскиот јазик и култура како и јазикот и културата на припадниците на заедниците во Република Македонија кои не се мнозинство, и поддршка на конкретни проекти и активности на иселениците и иселеничките организации од страна на надлежните државни органи“.
Вториот ден ќе биде посветен на темите за државјанство и избирачко право и организираност и поврзаност на иселениците од Македонија и нивните организации во светот и нивна соработка со Агенцијата за иселеништво на Република Македонија.
На вториот ден, претставниците на иселеничките организации ќе имаат можност да добијат и информации од тројцата пратеници од дијаспората за проблемите со кои се среќаваат во средините каде живеат и работат.
Четвртата годишна конференција на иселеничките организации, според најавата на организаторите, ќе ја затвори претседателот на Република Македонија Ѓорге Иванов со доделување одликувања и признанија за особени заслуги и достигнувања на физички и правни лица од иселеништвото, за афирмација на Република Македонија во светот во сите области на општественото делување. Доделувањето на одликувањата ќе се одржи на 26 јули во Музејот на националната борба.