Централниот Комитет на ВМРО-ДПМНЕ, на предлог на претседателот Христијан Мицкоски, денеска го изгласа Ѓорѓија Сајкоски за нов генерален секретар на партијата.
Сајкоски кој доаѓа на местото на Игор Јанушев, кој претходно си поднесе оставка од лични причини, во минатото има извршувано повеќе функции: Претседател на Совет на Општина Кичево во периодот од 2009 година до 2013 година, беше заменик министер во министерство за локална самоуправа и директор на ЈП „Студенчица“.
Од ВМРО-ДПМНЕ велат дека членовите на ЦК на партијата го избрале и му дале поддршка на Сајкоски, оти веруваат дека тој одговорно ќе ја врши функцијата генерален секретар и ќе ги застапува конкретните политики на партијата.
И лидерот на ВМРО-ДПМНЕ, Христијан Мицкоски, преку својот Фејсбук објави дека Ѓорѓија Сајкоски е избран за нов генерален секретар на партијата.
-Централниот Комитет на ВМРО-ДПМНЕ го изгласа Ѓорѓија Сајкоски за нов генерален секретар на партијата. Сајко нека е со успех позицијата, нѐ чека многу работа и заеднички битки. Се до конечна победа над мафијата!, напиша Мицкоски на фејсбук.