Филмот „Господ постои, името и е Петрунија“ на Теона Стругар Митевска ја доби наградата „ЛУКС 2019“ на Европскиот парламент, која беше доделена на свечената церемонија во пленарната сала на Парламентот.
Првпат откако е воведена оваа награда пред тринаесет години, добитник е македонски филм. Филмот „Господ постои, името и е Петрунија“ на Теона Стругар Митевска е копродукција меѓу Северна Македонија, Словенија, Белгија, Хрватска и Франција.
Претседателот на Европскиот парламент Давид Сасоли и ја предаде наградата на режисерката Теона Стругар Митевска во присуство на главната актерка која ја игра улогата на Петрунија Зорица Нушева и актерката и продуцент на филмот Лабина Митевска.
-Често сум критикувана во Македонија од политичарите, бидејќи сум многу политички, тоа е вистина, бидејќи како автор сум заинтересирана за тоа што се случува во моето општество. Моја должност е да зборувам за проблемите за кои никој не се осмелува да зборува, рече режисерката Стругар Митевска додавајќи дека „Петрунија, благодарејќи на својата отпорност и храброст допре толку многу срца“.
Притоа, се обрати до европратениците барајќи да ги бранат правата на слобода и на збор на уметниците и авторите.
-Јас сум жена, јас сум Македонка, јас сум европјанка, иднината на Европа е во солидарноста во инклузијата, а не во ексклузијата, рече Стругар Митевска од говорницата на Европскиот парламент.
Покрај „Господ постои, името и е Петрунија“ за наградата во финалната трка се најдоа се уште и „Нерешениот предмет Хамарскјилд“ на Мадс Бругер (Данска / Норвешка / Шведска / Белгија), и „Ел Реино“ (Шпанија / Франција) од Родриго Сорогојен.
Годинава меѓу десетте филмови кои беа во селекцијата за наградата ЛУКС 2019, од кои беа избрани трите финалисти, имаше уште еден македонски филм „Медена земја“ на Љубомир Стефанов и Тамара Котевска.
За Наградата „ЛУКС 2019“ гласаа европратениците, оние кои ги видоа филмовите, всушност тие се финалното жири за наградата, откако филмовите беа селектирани од филмски професионалци од земјите членки на ЕУ.
Европскиот парламент ги покрива трошоците за титлување на трите финални филмови на 24 официјални јазици на ЕУ и изработува дигитална копија на филмовите за секоја од земјите-членки.
ЛУКС наградата за филм е посветена на промоција на европското кино и има за цел да го поддржи ширењето на европските продукции и да ја стимулира дебатата на ниво на целиот континент за главните политички и општествени теми. Таа првпат беше доделена во 2007 година.
Пред десетина дена, екипата објави дека филмот ја доби престижната Одисеј – наградата за Човекови права на Советот на Европа , Odyssée Conseil de l’Europe aux Droits de l’Homme од страна на Советот на Европа.
Критиките за „Господ постои, името и е Петрунија“: Филмска комета од Македонија