Договорот меѓу Владата и раководството на Синдикатот за образование, наука и култура (СОНК) за зголемување на платите од 12 проценти, не важи за членовите, па денеска продолжува штрајкот во основните и во средните училишта, а, според најавите, ќе трае сè додека не се најде прифатливо решение за двете страни. Од друга страна, СОНК одлучи градинките да продолжат со редовно работење.
Претседателот на СОНК, Јаким Неделков, по вчерашната објава дека членството не го прифатило предлогот за зголемување на платите од 12 проценти, најави дека Синдикатот одлучил да организира голем масовен протест пред Владата в среда на 4 мај 2022 година.
„Од вкупно 480 синдикални организации кои доставија податоци за нивното изјаснување, 388 беа за продолжување на штрајкот од утре, а 83 беа за прекин. Најголем дел од овие што се изјаснија за прекин на штрајкот, се синдикалните организации од детската заштита, а без исклучок, огромниот број кои беа за продолжување на штрајкот се колегите кои се вработени во основното и во средното образование. Советот на СОНК, со оглед на сумираните резултати, донесе одлука дека штрајкот во основното и средното образование продолжува и во текот на утрешниот ден се до наоѓање на заедничко прифатливо решение помеѓу Синдикатот и Владата“, нагласи вчера Неделков.
Тој додаде дека Советот на СОНК, врз основа на изјаснувањето на синдикалните организации од детските градинки, донел одлука во градинките штрајкот да се стави во мирување.
Откако СОНК објави дека се усогласил со Владата за 12 процентно зголемување на платите, членови на Синдикатот вчера се собраа пред седиште да протестираат. По искажаното незадоволство, Неделков ги оквалификува како шпекулации информациите дека е потпишан договор со Владата и дека било поткупено раководството на Синдикатот.
Штрајкот во основното и во средното образование и во детските градинки почна на 11 април. СОНК веќе вторпат одбива владин предлог за зголемување на платите, бидејќи сè уште не го постигнале тоа што го бараат. Владата првично предложи зголемување на платите од 10 проценти, а потоа на 12 отсто, но СОНК бара покачување од 18,4 проценти и усогласување на останатите плати со минималната плата и ќе го продолжи штрајкот се додека не се најде компромисно решение за двете страни.
По одлуката на СОНК, да продолжи штрајкот, реагираше министерот за образование и наука Јетон Шаќири, кој нагласи дека зборот на СОНК не издржал ниту едно деноноќие.