Граѓаните од Валандово, Гевгелија и Богданци мака мачат со редовниот автобуски превоз и поврзувањето со Скопје и другите градови во државата јавува Телма
На автобуската станица во Валандово има истакнато возен ред, но граѓаните кои со часови чекаат автобус мора со такси да заминат до саканите дестинации бидејќи само еден автобус дневно заминува за Скопје и доколку не успеат да стигнат на време, треба да чекат до наредниот ден.
-Еден поминува во 6,40 часот. Ако не заминеш со него го испушташ, друг нема, ти реков, утре ќе го чекаш. Тоа е, што друго да ти кажам, вели еден жител на Валандово.
Иста е состојбата во Богданци и Гевгелија. Иако неодамна беше пуштена во употреба новата автобуска станица нема редовен превоз. Само инцидентно се појавува по некој превозник.
-Нема автобус сега, заминал во 10 часот, јас дојдов во 11. Сега ќе чекам во 12 часот, вели една гевгеличанка.
Според Убавка Вегова, директорка на комуналното претпријатие во Гевгелија, кое управува со автобуската станица, нередовниот превоз се должи на тоа што превозникот „Млаз“ од Богданци воопшто не се придржува до возниот ред и не ги одржува линиите. Доделувањето линии е во надлежност на министерството за транспорт и врски, вели таа.
За да се реши проблемот, според неа, министерот Миле Јанакиевски треба да му ги одземе лините на досегашниот превозник и да ги додели на друг.
Инаку, гевгеличани и жителите на околните градови на располагање имаат и железнички превоз, но поради намалување на бројот на возовите жителите од југоистокот на државата за да стигнат најсигурно до Скопје најпрвин треба да заминат за Дојран и оттаму да продолжат со една од двете попладневни линии.