Граѓаните кои го пропуштиле терминот за вакцинација против ковид-19 поради најразлични причини се интересираат дали може да презакажат и кога повторно ќе стасаат на ред за имунизација. Матичните лекари велат дека најчесто кај нив реагираат помлади граѓани кои уште пред два-три месеци се пријавиле за вакцина, а сѐ уште не добиле термин.
Во врска со тоа дали овие граѓани коишто не се вакцинирале во закажаниот термин по презакажувањето ќе бидат планирани како последни за вакцинација од Министерството за здравство одговараат:
-Граѓаните кои го испуштиле терминот за вакцинација, повторно треба да се пријават за вакцинирање на vakcinacija.mk или кај матичниот лекар. Тие влегуваат во групата, односно временскиот период кога извршиле пријавување, Доколку граѓанинот сам не се откажал од термин за вакцинација (опција што постои на vakcinacija.mk) поради здравствени причини, електронскиот систем автоматски ги повлекува регистрациите и на граѓаните им испраќа порака за закажан термин за вакцинација – појаснуваат надлежните.
МН: Кој прележал ковид-19, по еден месец може да се вакцинира
Од друга страна термини за вакцинација стасуваат и на некои од граѓаните коишто пред само еден месец прележале ковид-19, па тие се во дилема дали да побрзаат на вакцина или сепак да почекаат.
За тоа кој е протоколот за заштита на овие лица, односно кога најрано по оздравувањето тие можат да примат вакцина, а кога таа најдоцна се препорачува да се прими – дали по шест или девет месеци од болеста, од Министерството појаснуваат:
– Комисијата за ковид-имунизација има донесено одлука пациенти со прележан ковид да може да се вакцинираат еден месец од денот на оздравување – додаваат надлежните.
Според најновите истражувања, IgG антитела на ковид-19 се детектираат и девет месеци по прележување на болеста.
Матична докторка од скопски Аеродром раскажува дека овие неколку недели телефоните во ординациите најчесто ги вжештуваат помладите граѓани.
- Помладите пациенти најчесто ни се јавуваат со прашања – дали сум влезен во системот, зошто се уште не сум повикан, иако дури во февруари се пријавив за вакцина и друго… Тие воедно се и најмногу револтирани бидејќи, како што објаснуваат, одат на работа, се среќаваат со повеќе луѓе, па имаат и поголем ризик да се заразат со вирусот, па оттаму сметаат дека и побрзо треба да стасаат на ред за вакцинација. Им кажуваме дека ред мора да постои, а очекуваме во земјата да се отворат и повеќе пунктови за вакцинација. Ете, во Њујорк почнаа и во метро да даваат вакцини, некаде и во паркови и на останатите места каде граѓаните доаѓаат да се рекреираат. – велат во оваа ординација.
Љубица Балабан