Во постојано присуство на полицијата во паркот кај Бристол граѓаните ноќта ја минаа во четирите шатори, поставени врз опустошениот парк.
Велат остануваат тука и покрај тоа што дрвјата се исечени, тие паркот ќе го чуваат.
Паркот беше опустошен саботата спрема неделата во три часот по полноќ, кога специјалци ги обезбедуваа дрвосечачите кои со моторни пили ги исекоа 40 години старите дрвја, едни од последните во општина Центар.
>>Протест против синоќешното сечење на дрвата кај Бристол
>>Јавноста жестоко реагира по сечата на дрвата кај х.Бристол
По синоќешниот протест кога околу стотина граѓани револтирани од односот на власта се собраа кај Бристол, граѓанските иницијативи најавуваат продолжување на протестите во текот на наредните денови, каде покрај говорите ќе има и музички настапи.
Според измените на ДУП-от на тоа место треба да се гради нова барокна зграда на Советот за радиодифузија.
„Од законски аспект работата е завршена пред да дојдам на функција. Исто како што и ноќе се сечеа дрвата, претходното општинско раководство го изгласа ДУП-от и целиот простор е во раце на централната власт. Не може сега да се преземе ништо легално. Ист е случајот и со катната гаража кај Авто-Македонија која ќе се гради во висина на зградите во барок стил“ рече денеска пред новинарите Жерновски.
„Никогаш повеќе во општина Центар нема да се носат ДУП-ови без да се прашаат граѓаните. Сакам да го спречам дивеењето во Центар. Не давам одобрение за градба на каракатуралното здание „Шпански скали“, рече Жерновски.