Универзитетски професори, теоретичари, актери и новинари, како и група од стотина граѓани, синоќа во 20 часот се собраа пред споменикот на Славко Јаневски во паркот „Жена борец“, за да го кажат своето „не“ за планот Градскиот трговски центар да биде облечен во барок.
Д-р Никос Чаусидис на собраните им се обрати со пораката:
– Како што ние се идентификуваме со нашето тело, така се идентификуваме и со нашата куќа. А, промената на нашата куќа, значи промена и на нашиот идентитет.
За колумнистот Ѕвездан Георгиевски, ГТЦ не е само симбол на градот, туку и симбол на еден живот.
Според него „исчезнувањето на вакот трговски центар значи и поништување на цела една урбана генерација што е изрсната тука“.
Граѓаните пак за НОВА велат: Да им направиме еден споменик на кој што ќе бидат запишани имињата на сите архитекти соучесници на овој злочин со проектот „Скопје 2014“.
Од Асоцијацијата на архитекти најавија дека од први јули, секој четврток ќе организираат настани за да докажат дека им е битен изгледот на ГТЦ.
Пред две седмици започна акцијата за одбрана на ГТЦ, кога со жив ѕид околу трговскиот центар над илјада луѓе фатени за раце порачаа дека нема да дозволат истиот да биде претворен во барокна зграда.
Идејата потекна од Асоцијацијата на Архитекти на Македонија кои го кренаа гласот против грубото газење на авторските права на архитектот Живко Поповски.