Во иднина секој граѓанин на Македонија ќе мора да се изјасни дали сака да ги донира своите органи после смртта. Откако пред една недела измените на Законот за трансплантација поминаа во Собранието, Лекарската комора започна со подготовките за негова примена во праксата.
Веќе е формирана комисија за трансплантација која ќе се занимава со организациските работи, а наскоро треба да биде назначен и национален координатор. Етичката комисија ќе биде составена од матични лекари, нефролози, педијатри, филозофи и преставници од верските заедници.
-Најголемиот проблем со кој очекуваме дека ќе се соочиме е организационен и кадровски. Во здравството треба да се подобрат кадровските капацитети, да се работи на организација за сето тоа да може да функционира и да се едуцираат граѓаните изјави доктор Игор Николовски од Клиниката за нефрологија.
Првиот чекор се матичните лекари кои треба да земаат изјави од своите пациенти во кои тие треба да се изјаснат дали сакаат да ги донираат своите органи во случај на мозочна смрт.
Овој месец наши лекари ќе одат на обука во Хрватска која е водечка земја за кадаверичната трансплантација во Европа, а во октомври лекари ќе се обучуваат во Франција. Овој закон се заговараше во Македонија цели дваесет години, првите подготовки започнаа во време на екс министерот Владо Димов, но измените беа направени кога министеруваше неговиот наследник Бујар Османи.
Сите овие години медиумите имаа силно влијание за да се создаде поволна клима за донесување на законот и негова примена. Останува на тие што се назначени, како ќе ја организираат целата работа.
Во пракса очигледно сеуште не се создадени услови за да се развие свеста кај граѓаните за да ги донираат своите органи на тие што им се потребни во моментот. Во ВИДЕОТО погледнете како реагираат граѓаните на оваа тема.