Одлуката со која Град Скопје сака да ја врати калдрмата на плоштадот не може никако да се оправда од аспект на архитектурата, градежништвото, урбанизмот, па и естетиката, вели професорот Мирослав Грчев.
Грчев за 24 вести вели дека е чисто малоумие повторното поставување на коцката која не е материјал наменет за потребите на современото живеење.
Промената на коцката во 2004 година изнесувала околу 2 милиони евра, а постоечката гранитна плочка е направена по највисоки светски стандарди за обработка на пешачки површини во централно градско подрачје, додава поранешниот градоначалник на општина Центар.
Колку пари ќе чини најавената реконструкција на плоштадот, од Град Скопје велат дека ќе се знае по завршувањето на јавната набавка, но информираат дека две-третини од финансиските средства ќе бидат обезбедени од Владата, а една третина од буџетот на Град Скопје.