Архитектот Мирослав Грчев вели дека промената на физичкиот изглед на 10-катната зграда на ЕВН во барок, претставува насилство, акт на бришење и уништување на идентификациониот лик на еден народ. Според него владата врши поробување на сопствениот народ со регресивна, режимска идеја дека е возможно со немушт јазик, со пелтечење и архитектонско бунцање набрзина да се испише нова приказна за нашата историја и култура.
„За стилот со кој ќе се уништи сегашната стаклена зграда нема врска со барок или кој и да е -изам кој владата го протнува. Ако треба да се говори за некој изам, тоа е идиотизам“, изјави Грчев за Телма.
Според архитектот Александар Смилевски се работи за обезличување.
– Идејата е да се избрише и да се направи обезличување со стил кој бил актуелен пред 300 години – рече Смилевски.
Зградата на ЕВН е изградена 1962 година а последен пат е реконструирана на крајот на 90-тите години кога во неа се вградени најсовремени материјали за изолација и енергетска ефикасност.
Компаниите ЕВН и ЕЛЕМ во барокната фасада ке вложат 4,3 милиони евра. Од таму,велат дека реконструкцијата е одамна планирана затоа што се работи за дотраена фасада. Градежните работи ке ги изведува Бетон но засега не е презицирано кога започнуваат со работа.