Грчкиот Парламент доцна синоќа ги усвои пакетот закони за преструктуирање на државниот сектор, кои ги бараат меѓународните кредитори на земјата.
Новите закони го отвараат патот за масовни кратења во државниот сектор на Грција. Нивното усвојување беше услов за отпуштањето на следната транша од пакет за спас на земјата во висина од 6,8 милијарди евра од страна на Европската унија и Меѓународниот монетарен фонд.
Гласањето беше првиот важен тест за Владата на премиерот Андонис Самарас, откако најмалиот партнер, Демократската левица, минатиот месец ја напушти владејачката коалиција во знак на протест поради затворањето на државната радио и телевизија ЕРТ.
Пакетот вклучува кратење или префрлување на работни места на 25 илјади државни службеници, претежно наставници и локални полицајци. Пакетот предвидува укинување на 15 илјади работни места во државниот сектор до крајот на 2014 година и префрлување на 12.500 вработени во т.н. „мобилна шема“, при што тие ќе бидат преместени на други должности и ќе треба да си најдат нова работа во рок од осум месеци, по што ќе бидат отпуштени.
Изминатите денови беа одбележани со секојдневни протести и штрајкови против новите мерки.
Околу пет илјади лица протестираа пред Парламентот пред гласањето, извикувајќи пароли против економските мерки.