Грчкиот Парламент изутринава изгласа доверба на коалициската влада Нова демократија-ПАСОК со 153 гласа „за“, 124 гласа „против“ и 17 воздржани.
Над илјада активисти на најголемата левичарска опозициска партија Сириза, протестираа доцна синоќа во Атина против владините мерки за штедење, непосредно пред гласањето за недоверба на владата, јавува МИА.
Според проценките на полицијата на улиците на Атина излегле околу 2.000 луѓе, додека според новинарите и организаторите најмалку 5.000 лица.
Демонстрантите бараа смена на владата и носеа транспаренти „Отставка веднаш“ и „НЕ на политиката за штедење“. Протестот се одржа додека Парламентот расправаше за гласањето за недоверба на владата, предложено од лидерот на Сириза Алексис Ципрас.
Ципрас побара гласање недоверба на владата откако пред два дена грчката полиција упадна во зградата на ЕРТ и исфрли неколку десетици демонстранти, кои во нејзините простории се наоѓаа од јуни, кога властите неочекувано го затворија јавниот сервис.
Сириза соопшти дека бара гласање недоверба на коалициската влада на конзервативниот премиер Антонис Самарас, поради нејзината катастрофална политика. Дебатата за гласањето почна во петокот.