Грчкиот суд ја суспендираше владината одлука за затварање на јавниот сервис ЕРТ и наложи телевизијата повторно да емитува програма додека да се реши прашањето за формирање на нов јавен сервис, јавува BBC.
Судот ја донесе оваа одлука како одговор на жалбата на синдикатот на ЕРТ кој се жалеше на изненадната одлука на владата во вторникот да се изгаси сигналот на државата телевизија.
Судот ги повика одговорните министри да овозможат услови за воспотавување на „привремен“ јавен сервис додека да се реши прашањето.
Грчкиот премиер Андонис Самарас денеска повторно предложи државната радио и телевизија ЕРТ да биде „привремено повторно отворена“ под раководство на трипартиска комисија, соопшти неименуван извор од владата.
Комисијата составена од претставници на трите партии во владината коалиција, ќе има задача да именува одреден број новинари кои ќе работат на државната радио и телевизија, додека не биде усвоен нов предлог закон за јавнот медиумски сервис, изјавил Самарас, според истиот извор, пренесува БТА.
При создавањето на новиот сервис ќе помогнат странски консултанти од Би-Би-Си и други европски компании.