На само 15 минути пред отворањето на берзите во Европа, Еврогрупата најави дека е најден компромисен договор за решавањето на грчката криза по 17 часа интензивни преговори.
Добрата вест ја потврдија и самите берзи кои утринава во 9 часот покажаа покачување на акциите.
Веста прв ја јави белгискиот премиер, а потоа тоа беше потврдено од германски владини извори.
Потоа стаса и твит од претседателот на Советот на ЕУ Доналд Туск според кој договорот е постигнат едногласно околу мерките што Грција треба да ги спроведе за да добие трет план за помош. Мерките според Туск треба да бидат сериозни и да донесат финансиска поддршка.
На прес конференцијата на претседателите на Европската комисија Жан-Клод Јункер, на Советот на ЕУ Доналд Туск и на Еврогрупата Јерун Дејселблум траеше кусо, а истовремено се одржуваа и прес конференции на европските лидери.
Дејселблум изјави дека 25 милијарди ќе видат наменети за рекапитализација на грчките банки.
Според белгискиот премиер Шарл Мишел и францускиот претседател Франсоа Оланд, се уште има работа за да се дефинираат мерките кои треба да го придружуваат планот за спас на Грција:
“Договорот е тука и и дозволува на Грција да остане во еврозоната. Целта беше еврозоната да остане заштитена во својот интегритет. И да и се даде надеж на Грција по толку години штедење и страдање. Но јасно е дека Грција ќе мора уште многу да работи”, изјави Оланд.
Според Оланд, ќе беше трагично ако еврозоната мораше да се раздели од Грција која е “во срцето на нашата цивилизација”.