Секои избори претставуваат тест за демократската зрелост на едно општество и токму заради тоа го испратив писмото, за да биде едно потсетување за тоа кои се обврските, не само на политичарите, туку и на сите институции и на централно и на локално ниво, рече вицепремиерката за добро владеење Славица Грковска во интервју за Слободен печат, одговарајќи на прашање поврзано со неодамнешното отворено писмо што таа го испрати во јавноста.
„Изборите треба да бидат еден празник на демократијата, каде што граѓаните во суштина треба да ја покажат својата моќ на одлучување, односно да го одберат оној кој сметаат дека со својата програма најдобро ќе ги застапува интересите на нашата држава. И ова не го зборувам случајно, заради тоа што обврска е на сите политички чинители, без да се служат со дезинформации, со лажни вести, во своите програми да го претстават точно она за коешто ќе се залагаат доколку ја добијат довербата и на тој начин да ја бараат довербата од граѓаните“ посочи таа.
Во однос на политичките превирања што се случуваат, Грковска истакна дека тоа е нормална појава во секоја демократија, но се додека тие се во границите на една нормална политичка дебата.
„Политичките превирања се, би рекла, нормална појава во секоја демократија, се додека се во рамките на една нормална политичка дебата и аргументација, без насилство, без заплашувања, без некои други форми коишто немаат врска со демократијата и тоа нас ниту треба да не вознемирува, ниту треба да не плаши, тоа е нормален процес, се додека се задржува она културно демократско ниво на комуникација. Ние по секоја цена треба да избегнеме немили слики од не така далечното минато кои се случуваа во предизборниот и изборниот процес и во суштина, овие процеси ќе покажат дали во степенот на демократија сме созреале повеќе отколку претходно“ заклучи Грковска.,