Тела плутаат среде расцепканите остатоци во водата во близина на грчкиот остров Китира, додека бројот на загинати од потонувањето на два брода со мигранти се искачи на 21, а многумина се уште се водат за исчезнати. Причина за потонувањето на двата брода е судирот со подводни карпи.
Бродовите потонаа на оддалеченост од десетици километри, предизвикувајќи драматични напори за спасување во текот на ноќта, бидејќи жителите и пожарникарите ги извлекуваа на безбедно мигрантите кои скокаа или паѓаа од бродовите.
Инцидентот предизвика тензии меѓу соседите Грција и Турција, кои се заглавени во жесток спор околу миграцијата и поморските граници.
Крајбрежната стража на источниот остров Лезбос соопшти дека таму биле пронајдени 16 тела на млади африкански жени и еден млад маж откако потонал гумен чамец со околу 40 луѓе. Десет жени се спасени, додека 13 други мигранти се водат како исчезнати, соопштија претставници на крајбрежната стража.
Втората спасувачка акција се одигра неколку стотици километри на запад, во близина на островот Китира, каде што бродот удри во карпи и потона.
Телата на најмалку четворица мигранти беа видени среде остатоците што пловеа од бродот. Смртта ќе биде официјално евидентирана кога ќе бидат извлечени телата, рекоа официјални лица. Тие додадоа дека 80 лица, од Иран, Ирак и Авганистан, се спасени додека продолжува потрагата по дури 11 за кои се уште се верува дека се водат како исчезнати.
Китира е на околу 400 километри западно од Турција и на рута која често ја користат шверцерите за да ја заобиколат Грција и да се упатат директно кон Италија.