По девет години криза во Грција, земјата излегува од економските и финансиски неволји.
Според Клаус Реглинг, генералниот директор на Европскиот механизам за стабилност, Грција “повеќе не е во криза”, изјави тој пред неколку дена по средбата на министрите за финансии на евро-зоната, пренесува агенцијата АФП.
Со самото тоа, Грција се надева дека ќе започне со преговори за намалување на националниот долг кој во 2017 година изнесува 178 отсто од бруто внатрешниот производ. Минатата година Грција за прв пат имаше вистински економски раст од 1,3 отсто а економистите очекуваат дека во 2018 година тој ќе изнесува 2 отсто.
“Беше вистинско задоволство да се сретнам со премиерот Алексис Ципрас во Давос и му честитав за напредокот на неговата земја”, изјави Кристин Лагард, генералната директорка на Меѓународниот монетарен фонд (ММФ).
Тонот на кредиторите е денес помирен отколку што беше во јануари 2015 година кога Ципрас дојде на власт. Неговата лево радикална програма беше против плановите за кредити и бараше од кредиторите пари за да може Грција да ги спроведе реформите што во 2010 година ги побараа ЕУ и ММФ.
Грција се надева дека во август ќе биде крај на плановите за заздравување на економијата. Третата ревизија на актуелниот план или програма ќе и дозволи на Грција да добие 6.7 милијарди евра од февруари до април.
Многу Грци можат да се најдат на улица
Но за да ги добие овие пари, владата на Ципрас ќе мора да покаже ефикасност во примената на новиот систем на продажба на недвижнините на задолжените Грци преку наддавање на интернет.
Во 2015 година за време на изборната кампања, еден од слоганите на Ципрас и неговата Сириза беше “Ниту една куќа кај банките”. Но, кога дојде на власт не можеше да избега од притисокот на меѓународните позајмувачи кои денес оваа продажба ја поставуваат како услов за нови заеми за грчката држава. Над 10.000 продажби се превидени годинава и 40.000 годишно во наредните три години.
Станува збор за куќи купени со кредит што денес новиот сопственик не може да го враќа бидејќи останал без работа. И што е најлошо, државата не предвидува никаква помош за лицата што се овие продажби ќе се најдат буквално на улица.
Така што денес може да се каже дека Грција излегува од криза но Грците се уште не.
Анкети: Сириза ќе ги загуби изборите во 2019 година
Со овие мерки, анкетите на јавното мислење во Грција покажуваат дека владеачката партија на премиерот Алексис Ципрас ќе ги загуби наредните избори во 2019 година. Изборите би требало да ги добие десната Неа Демократија. Но изборите во Грција се закажани за октомври 2019 година а дотогаш уште многу вода ќе протече низ грчките мориња.