Њујорк: Советот за безбедност на ОН синоќа усвои резолуција со која се поддржува мировниот план за Газа на американскиот претседател Доналд Трамп.
Тринаесет членки гласаа за предлогот на САД, кој предвидува и меѓународни сили за помош во стабилизирањето на прекинот на огнот. Русија и Кина беа воздржани, јави ДПА.
Групата седум (Г7) водечки демократии неодамна се залагаше за мандат од Советот за безбедност за да се обезбеди брза имплементација на планот.
Во втората фаза, планот предвидува разоружување на палестинската милитантна група Хамас, распоредување на меѓународни стабилизациски сили и воспоставување преодна администрација од палестински технократи.
Неколку прашања остануваат спорни, вклучувајќи го разоружувањето на Хамас, целосното повлекување на израелските сили и иднината на Појасот Газа.
Израел изрази критики пред гласањето поради повикувањето на резолуцијата на „веродостоен пат кон палестинско самоопределување и државност“.
Овој потег означува редок пробив за Советот, кој честопати беше длабоко поделен за ова прашање во последните години, и сигнализира дека мировниот процес на Блискиот Исток добива поширока меѓународна поддршка, коментира германската новинска агенција.
Соединетите Американски Држави силно се залагаа за усвојување на резолуцијата, која сепак беше изненадување за многу набљудувачи.
Во пресрет на гласањето, долго време изгледаше дека резолуцијата може да пропадне. Русија и Кина – двете сили со право на вето во Советот – сигнализираа незадоволство, а Русија дури и циркулираше своја нацрт-резолуција, кој на крајот не беше ставен на гласање.