Премиерот Никола Груевски порачува да не се чепка правото на глас на дијаспората оти тоа претставувало начин државата да им се оддолжи на Македонците надвор за нивната поддршка.
– Она што во изминатиот период се предлагаше беше не да се укине гласањето на дијаспората, туку да се направат такви законски измени со коишто дијаспората ќе има еден или ниеден пратеник. Доколку опозицијата или која било партија има забелешки на изборниот процес и неправилности во изборниот процес ние сме целосно отворени да ги разгледаме, да промениме нешто, да подобриме, да надградиме, но не и да се направат закони со кои де јуре дијаспората ќе има три пратеници, но де факто во реалноста кога ќе дојдат изборите ќе има еден или ниеден пратеник. Такво нешто не е фер кон луѓето во дијаспората. Тоа е на некој начин работење зад грб на дијаспората, рече премиерот Никола Груевски од Беровско.
Вчера работните групи на четирите политички партии ВМРО ДПМНЕ, СДСМ, ДУИ и ДПА за спроведување на договорот од Пржино почнаа со работа токму од проблематиката врзана со изборниот процес. Вчерашниот состанок не заврши со конкретен договор, но сите страни навестија дека постои извесен напредок.
И невладината организација МОСТ која повеќе од 13 години ги следи изборите во Македонија во пресрет на состаноците на рабтните групи вчера излезе со препораки за изборните процес. Тие предложија суспендирање на правото на глас во дијаспората на следните избори додека да се дојде до оптимално решение, а за понатаму предлагаат „да се ревидира системот за гласање во странство, со оглед на нееднаквата можност за остварување на правото на глас и нееднаквоста на гласот во РМ и во странство’.
МОСТ, исто така, предлагаат забрана за донации од медиуми во време на кампања и отворени листи.