Премиерот Никола Груевски денеска повторно упати апел до СДСМ да ги надминат внатрешните несогласувања за да се изнајде решение за работата на Комисијата за настаните од 24 декември 2012 година, чија блокада може негативно да се одрази на претстојниот извештај на Европската комисија за напредокот на Република Македонија.
– Засега сме фокусирани и ќе останеме фокусирани на дијалогот, на изнаоѓање решение. Ја користам и оваа прилика да упатам апел до СДСМ да најдат начин да дојдеме до решение, да излезат од внатрешните проблеми во партијата барем по ова прашање.
Не претендирам за нивните други внатрешни прашања, но барем за ова прашање да најдат начин да помогнат на државата, не на ВМРО-ДПМНЕ или на Владата. Станува збор за проблем кој што и го создаваат на државата со нивните препреки внатре во партијата-рече Груевски на новинарско прашање по посетата на археолошкиот локалитет Скупи, крај Скопје.
Премиерот вчера излезе со слична порака, но и најава на нови стратеги:
-Како партија нема да останеме неми набљудувачи на овие последици и доколку во наредните денови не се најде решение, ќе размислиме за нови чекори и нови стратегии кои ќе бидат сосема различно од она што е сега, рече Груевски во село Ростуше, каде што претходно отвори спортска сала.
Груевски пред новинарите не откри што подразбира под нови стратегии, различни од она што е сега.