Утрешниот ден, 15 јануари, е клучен за политичкиот договор. Комесарот за проширување Јоханес Хан кој пристигнува утре во Скопје вели дека сите битни точки од овој договор мораат да бидат решени денес или најдоцна утре.
Ова е пораката на Хан што тој одлучи да ја прати пред да се качи на авион за Скопје попладнево. Со оваа порака тој изразува надеж дека изборите ќе можат да се одржат според договореното на 24 април.
– Овој 15 јануари е клучен рок за политичкиот договор и неговата примена кој е важна и за Владата и за граѓаните на земјата. Очекувам дека сите битни елементи од политичкиот договор ќе бидат решени пред или за време на мојата посета со што ќе им се дозволи на изборните власти да организираат кредибилно избори според договорениот календар, вели Хан.
Хан најавува средби со четирите партии на кои ќе им повтори дека тие се одговорни за примената на договорот вклучително и “обезбедување на услови за кредибилни избори според договорениот рок кој тие го договорија“.
И ќе ги потсети дека е потребна и примена на “Итните реформски приоритети” за кои партиите исто така се обврзаа дека ќе ги применат.
Да потсетиме дека документот “Итни реформски приоритети” го направи Европската комисија според експертскиот извештај на Рајнхард Прибе.