Европскиот комесар Јоханес Хан вели дека е сосема свесен за ситуацијата во Македонија и потврдува дека во земјите членки на ЕУ се повеќе расте загриженоста за политичката криза во нашата земја.
“Целосно сме свесни за ситуацијата во поранешната југословенската република Македонија. Можеби знаете дека денеска во заклучоците на советот на ЕУ има неколку изјави: има растечка загриженост помеѓу земјите членки за развојот во земјата и од друга страна европското семејството ги препознава напорите на некои европратеници да посредуваат за политичко решение”, изјави денес Хан по средбата со балканските лидери каде што се разговарало за транспортните мрежи на Балканот и нивно поврзување со тие од Европа.
За Хан потребно е почитување на владеењето на правото и потребна е целосна истрага. Комесарот ја повика опозицијата да се врати во Собранието и таму да се формира истражна комисија која ќе го решава политичкиот дел од кризата:
“Исто така итно ја повикувам опозицијата да се врати во Парламентот, таму да имаат истражна комисија која ќе се занимава со ова од политичка перспектива, но ова не смее да значи неотварање на кривичниот аспект на случајот. Има две димензии: кривичната и политичката и позицијата на ЕК е јасна, двете области да се отворат и да се решат на конструктивен начин. Зборуваме за земја со европска перспектива а земја со европска перспектива мора да ги почитува меѓународните и европските стандарди на владеењето на правото”, вели Хан.
Комесарот денес се сретна со речиси сите балкански премиери но не и со Никола Груевски кој имаше средба само со првиот човек на европските демохристијани кој веќе два пати го прима Груевски од почетокот на кризата во Македонија. Според висок европски функционер во Брисел вчера и денес немало средби на високи европски функционери со македонскиот премиер. Нема информации дека Груевски се сретнал со други европски парламентарци.
Да потсетиме дека единствената средба на Груевски со високи функционери од ЕК беше таа со Хан кога комесарот допатува во Македонија на самиот почеток на објавувањето на “бомбите”. Претседателот на ЕК Жан-Клод Јункер одби да го прими Груевски и ја откажа средбата со јасна порака дека тоа го прави поради политичката криза во Македонија а истото се случи и со претседателот на Европскиот парламент Мартин Шулц.