Еврокомесарот за проширување Јоханес Хан денеска уште еднаш ги повика партиите да најдат датум за да може да се стави фокус на предизвиците со кои се соочува земјата.
-Тоа беше дел од преговори, тоа беше датумот и се дискутираше дали треба да се одложат изборите или не. Јас кажав дека треба избори кои можат да имаат висок степен на добра подготвеност и да бидат фер, транспарентни и според меѓунаронародните стандарди. Сторив се за да обезбеди неопходното набљудување како на пример ОДИХР кој ќе испрати 24 набљудувачи кои ќе останат подолго време. Да појаснам: за Турција ОДИХР испрати 30 набљудувачи и 3,400 на денот на изборите. Сакам да кажам дека е важно да се има избори според нашите стандарди за да се врати довербата во земјата и за да може да се мине на следниот чекор – да се убедат земјите членки да одобрат преговори.
Според Хан, претседателот на Државната изборна комисија побарал дополнителен персонал кој ќе ја прави теренската проверка.
– Пред разговорите во петокот претседателот на ДИК рече дека им треба неопходен персонал како информатичари, правници но и луѓе кои ќе ја прават теренската проверка а владата потврди дека ќе го дуплира персоналот но според мене уште е поважно да има договор помеѓу сите партии бидејќи тоа го успеавме во последните неколку месеци – примена на договорот од јуни и јули. Не секогаш на точниот датум што беше договорен, но на крајот беше применето. Би било одлично и изборите да се водат во тој дух и секој да ја има таа определба. Во секој случај сите актери да се држат до договорот од јуни и јули, рече Хан.
На новинарско прашање за итните реформски приоритети од извештајот на Рајнхард Прибе, Хан истакна дека е загрижен поради малиот напредок и очекува сите обврски да бидат применети до изборите.
-Загрижени сме поради тоа што има многу малку напредок а очекувавме повеќе. Има многу точки во извештајот на Прибе за кои очекувавме дека ќе бидат применети до изборите. Но се соочуваме со доцнења и бараме од партиите да ги применат бидејќи тоа е дел од реформите. Колку што побрзо ќе биде тоа применето толку побрзо земјата ќе биде подготвена за европскиот пат. Така што сето тоа е во рацете на одговорните политичари кои треба да ја подготват земјата, посочи еврокомесарот.
Во однос на тоа дали Македонија треба да биде загрижена за состојбата на земјава поради миграцијата, Хан вели дека има повеќе теми кои бараат целосно внимание и затоа е потребен датум со кој би се ставило фокус на предизвиците.
-Мојот коментар беше во врска си настаните од минатиот петок бидејќи има предизвици за земјата и за владата така што миграцијата е во овој момент можеби најголемиот. Нема сомнение дека ќе се соочиме со продолжување на оваа ситуација како во 2015 година и ако некои европски земји го направат тоа што го најавуваат и ги затворат границите, тоа ќе има влијание на состојбата во Скопје. Ова е еден пример. Вториот е економијата и невработеноста. Има многу теми за кои е потребно целосно внимание од страна на владата, опозицијата и парламентот. Оттука барам од нив да најдат датум за да може да се стави фокус на предизвиците со кои се соочува земјата, рече Хан.
Во поглед на медиумската сфера, Хан посочува дека мора да се направи компромис.
-Реструктуирањето на земјата има многу елементи па така и медиумите се дел од овие разговори што ги води Питер Ван Хауте. Тоа се однесува и на други земји од Балканот. Мора да се излезе од пристапот црно-бело. На демократијата и требаат компромиси и компромисите не се ништо лошо, тоа е ситуација во која некој нешто добива и од нешто се откажува. Тоа е во интерес на сите, да се биде посилен. Политичките елити тоа треба да го научат. Не станува збор да се биде губитник или добитник и ако вака се продолжи нема да може да се направи потребниот напредок. Станува збор за соработка и како да се најде решение кое е прифатливо за двете страни. Тоа е природата на демократијата – да се најде компромис. Добар дил, не лош туку добар, рече еврокомесарот Хан.