Попова Шапка останува едно од најомилените туристички места во земјата. Снегот привлече туристи од многу места, посебно љубители на зимските спортови.
Викендов скијачкиот центар беше преплавен од туристи кои покрај тоа што беа дојдени за скијање, дојдоа и на планинарење, шетање или за уживање на свеж и чист воздух.
За жал посетителите на ски центарот секојдневно се соочуваат со недостаток на слободни паркинг места, па се приморени со своите возила да го “окупираат” и самиот пат.
Иако од ски-центарот беше најавено дека заедно со полицијата ќе се најдат решенија за сообраќајниот метеж и паркирањето во екот на сезоната, попладнево поради огромната гужва, илијадници граѓани останаа заглавени во своите возила при обида да си заминат дома.
Инаку ова не се случува првпат на Попова Шапка кога е зимската сезона. Ова веќе трае со години, а ниту локалната, а ниту централната власт не се обиде да го реши проблемот со сообраќајот на Попова Шапка.