Преставки за стопирање на Законот за прекинување на бременоста пред институциите Претседател на републиката и Уставен суд најави невладината организација ХЕРА, веднаш по неговото изгласување во Собранието.
Во нивната реакција стои дека Министерството за здравство предводено од министерот Тодоров не ги сослушале препораките од граѓаните, од 72 граѓански организации, здруженијата на гинеколози, од 91 меѓународни организации и не ја прифатиле понудената помош од Светската здравствена организација.
-Ние баравме да се повлече Предлог законот од итна постапка и да се започне процедура на донесување на нов современ закон за прекинување на бременоста. Во недостаток на аргументи министерот Тодоров изнесе парцијални докази и нерелевантни примери од други земји, фаворизираше здруженија и религиски претставници, кои имаат ставови со кои се руши секуларноста на државата. На крајот, Тодоров започна и да делегитимира, да стигматизира, да потценува и да дисциплинира велат во својата реакција од ХЕРА.
Од ХЕРА велат дека и со дополнителните амандмани новиот закон ги ограничува правата на жената и е порестриктивен од претходниот. Сметаат дека не е потребно задолжително и дополонително советување за предностите од продолжување на бременоста, ниту чекање од три дена за одобрение. За нив спорна е и писмената согласност, како и актите за советување чија форма не е позната, како и правото да министерот да формира комисии.
И покрај несогласувањата и протестите пред Собранието пратениците денеска попладне во отсуство на пратеничката група на СДСМ, го изгласа Законот за прекинување на бременоста со 62 гласа „за“ и еден против.
Ивон Величковски, пратеникот на ЛП им порача да не го загорчуваат дополнително животот на жените кои се одлучиле на абортус. Тој беше единствениот пратеник кој гласаше против законот.
– Прифативте номинална расправа, а потоа продолживте со реклами. Со административни постапки се обидовте да креирате популациска политика. Ја вмешавте и црквата, ама ќе ви кажам дека државата ќе биде толку силна колку што ќе ја браниме секуларноста. Стимулирате абортус да се случува во шупи и гаражи наместо да ги едуцирате граѓаните – рече Величковски пред пратениците од ВМРО ДПМНЕ во Собранието.
Законот се изгласа во тензична атмосфера, додека пред општина Центар се случуваше протести и во јавноста се минимизира неговото донесување.